نیویارک: کوئینز بورو پل پر پیدل چلنے والوں اور سائیکل سواروں کے لیے جگہ دوگنی کرنے کا اعلان

کوئینز بورو پل نیویارک کے مصروف ترین پلوں میں سے ایک ہے، جہاں روزانہ تقریباً 2,785 پیدل چلنے والے اور 7,568 سائیکل سوار گزرتے ہیں

نیویارک (محسن ظہیر سے ) نیویارک سٹی کے میئر ایرک ایڈمز اور محکمہ ٹرانسپورٹیشن (DOT) کے کمشنر یدانس روڈریگز نے اعلان کیا ہے کہ کوئینز بورو برج پر پیدل چلنے والوں اور سائیکل سواروں کے لیے مختص جگہ کو دوگنا کیا جا رہا ہے۔ اس اقدام کے تحت پل کی ایک گاڑیوں والی لین کو پیدل چلنے والوں کے لیے مخصوص کر دیا جائے گا۔
اس اتوار 18مئی سے، پل کی شمالی بیرونی سڑک جو اس وقت پیدل چلنے والوں اور سائیکل سواروں دونوں کے لیے استعمال ہوتی ہے — صرف سائیکل سواروں کے لیے مخصوص کر دی جائے گی، جبکہ جنوبی بیرونی سڑک — جو محدود اوقات میں گاڑیوں کے لیے کھولی جاتی تھی — اب مستقل طور پر پیدل چلنے والوں کے لیے مختص کر دی جائے گی۔
میئر ایڈمز نے کہا،”کوئینز بورو برج گزشتہ 100 سال سے زیادہ عرصے سے مین ہیٹن اور کوئینز کے درمیان لوگوں کو جوڑ رہا ہے، چاہے وہ گاڑیوں میں ہوں، سائیکل پر ہوں یا پیدل۔ اب ہم اسے مزید محفوظ اور آسان بنا رہے ہیں۔ ہم جتنی سہولت پیدل اور سائیکل پر چلنے والوں کو دیں گے، اتنا ہی زیادہ لوگ ان طریقوں کو اپنائیں گے۔”
ڈی او ٹی کمشنر روڈریگز نے کہا،”ہم نے شہر میں ریکارڈ تعداد میں سائیکل سوار دیکھے ہیں کیونکہ ہم نے ان کے لیے محفوظ اور بامعنی راستے فراہم کیے ہیں۔ اب جنوبی بیرونی سڑک کو پیدل چلنے والوں کے لیے مختص کر کے ہم ان کے لیے آرام دہ راستہ فراہم کر رہے ہیں اور شہر بھر میں گاڑی کے بغیر سفر کو آسان بنا رہے ہیں۔”
کوئینز بورو پل نیویارک کے مصروف ترین پلوں میں سے ایک ہے، جہاں روزانہ تقریباً 2,785 پیدل چلنے والے اور 7,568 سائیکل سوار گزرتے ہیں۔ موجودہ مشترکہ راستے کی وجہ سے زیادہ رش اور خلل پیدا ہوتا ہے، خاص طور پر جب سے مغربی کوئینز میں سائیکلنگ انفراسٹرکچر میں اضافہ ہوا ہے۔پل کی جنوبی بیرونی سڑک کو 2013 سے رات نو بجے سے صبح 6چھ بجے تک بند رکھا جاتا ہے کیونکہ رات کے وقت حادثات کی شرح زیادہ رہی ہے۔ تاہم نئی ٹریفک رپورٹ سے ظاہر ہوتا ہے کہ باقی راستے بڑھتی ہوئی ٹریفک کو سنبھالنے کی صلاحیت رکھتے ہیں۔کوئینز بورو برج حالیہ برسوں میں تیسرا ایسا پل ہے جس پر پیدل چلنے والوں اور سائیکل سواروں کے لیے سہولیات کو بڑھایا گیا ہے — بروکلین پل پر 2021 میں اور واشنگٹن پل پر 2024 میں ایسا کیا گیا۔ بروکلین پل پر مخصوص سائیکل لین بنانے کے بعد سائیکلنگ میں 108 فیصد اضافہ دیکھنے میں آیا۔
ڈیپارٹمنٹ آف ٹرانسپورٹیشن نے جیکسن ہائٹس میں 34ویں ایونیو کو پہلی “اوپن اسٹریٹ” قرار دیا، جہاں اب 1.9 میل طویل کار فری زون ہے۔ 2022 میں ایڈمز انتظامیہ نے اس منصوبے کو مستقل بنانے کے لیے 89 ملین ڈالر مختص کیے۔مغربی کوئینز، خاص طور پر آسٹوریا، لانگ آئی لینڈ سٹی، اور وڈ سائیڈ میں محفوظ سائیکل لینز بنانے کے بعد، پل پر سائیکل سواروں کی تعداد میں 2020 سے اب تک 20 فیصد اضافہ ہوا ہے، اور اب روزانہ 6,267 سائیکل سوار کوئینز بورو پل استعمال کرتے ہیں۔یہ فیصلہ شہر بھر میں ماحولیاتی بہتری، صحت مند طرز زندگی، اور پائیدار آمدورفت کے فروغ کی جانب ایک اور عملی قدم ہے۔

Mayor Adams, NYC DOT to Double Space for Pedestrians and Cyclists on Queensboro Bridge