امریکہ میں جعلی شادی کیس میں انڈین امیگرنٹ ناصر حسین گرفتار

بھارتی شہری ناصر حسین کو جعلی امیگریشن درخواست جمع کروانے کے جرم میں سزا ،تحقیق ایف بی آئی نے کی، جسے یو ایس کسٹمز اینڈ امیگریشن سروسز کی طرف سے اہم مدد فراہم کی گئی

نیویارک ( اردونیوز) یو ایس کسٹمز اینڈ امیگریشن سروسز(یو ایس سی آئی ایس ۔USCIS) نے اس تحقیقاتی عمل میں قیمتی معاونت فراہم کی جس کے نتیجے میں ایک بھارتی شہری کو جعلی امیگریشن درخواست جمع کروانے کے جرم میں سزا سنائی گئی۔ورمونٹ میںیو ایس اٹارنی کے دفتر نے بھارتی شہری ناصر حسین کی سزا اور سزا یافتہ ہونے کا اعلان کیا۔ ناصر حسین پر امیگریشن درخواست، خاص طور پر آئی 360وی اے ڈبلیو اے (Violence Against Women Act) سیلف پیٹیشن میں جھوٹا اور گمراہ کن بیان دینے کا الزام ثابت ہوا۔ مقدمے میں سزا کے فوراً بعد حسین کو “ٹائم سرورڈ” (یعنی پہلے سے جیل میں گزارا گیا وقت ہی سزا تصور کیا گیا) کی بنیاد پر سزا سنائی گئی۔

یہ بھی پڑھیں ۔۔۔۔امریکہ میں امیگریشن کی اہم خبریں

عدالتی ریکارڈ اور مقدمے کے دوران پیش کیے گئے شواہد کے مطابق، ناصر حسین اکتوبر 2021 میں کنکٹی کٹ آیا تاکہ ایک جعلی شادی کے ذریعے امریکی شہریت حاصل کر سکے۔ حسین نے شادی سے پہلے یا بعد میں کبھی اس خاتون کو نہیں دیکھا جس سے اس نے شادی کی تھی۔ اس کے بعد حسین نے اپنی “بیوی” کے نام پر انشورنس پالیسیز خریدیں، میگزین سبسکرائب کیے اور سامان آرڈر کیا تاکہ یہ جھوٹا تاثر دیا جا سکے کہ وہ دونوں اورلینڈو، فلوریڈا میں اکٹھے رہتے ہیں۔
بعد ازاں حسین ایک ارجنٹ کیئر سینٹر گیا اور جھوٹا دعویٰ کیا کہ اسے اس کی “بیوی” نے جسمانی تشدد کا نشانہ بنایا ہے۔ حسین نے یہ جعلی شواہد اور میڈیکل ریکارڈ یو ایس سی آئی ایس کو آئی 360” وی اے ڈبلیو اے“ سیلف پیٹیشن کی حمایت میں جمع کروائے، یہ دعویٰ کرتے ہوئے کہ وہ ایک بدسلوک امریکی شہری کی بیوی ہے اور دونوں فلوریڈا میں ایک ساتھ رہتے ہیں۔
مقدمے کے دوران “بیوی” اور سابق روم میٹس کی گواہی سے یہ بات ثابت ہوئی کہ مذکورہ خاتون نے کبھی فلوریڈا میں رہائش اختیار نہیں کی، اور اس طرح حسین کا ظلم کا دعویٰ مکمل طور پر جھوٹا نکلا۔ اگر حسین کی یہ امیگریشن درخواست کامیاب ہو جاتی، تو اسے وی اے ڈبلیو اے ویزہ اور ممکنہ طور پر امریکہ میں مستقل رہائش (گرین کارڈ) مل سکتا تھا۔
ناصر حسین مئی 2023 سے وفاقی حراست میں ہے، جب اسے وائر فراڈ کی سازش کے الزام میں گرفتار کیا گیا تھا۔ یہ مقدمہ اکتوبر 2024 میں عدالت میں پیش ہوا، جہاں جیوری نے حسین کو قصوروار قرار دیا، تاہم عدالت نے بعد ازاں یہ فیصلہ کالعدم قرار دیتے ہوئے حسین کو بری کر دیا۔ امریکہ نے اس بریت کے فیصلے کے خلاف اپیل دائر کر رکھی ہے جو تاحال زیرِ التواءہے۔یہ تحقیق ایف بی آئی نے کی، جسے یو ایس کسٹمز اینڈ امیگریشن سروسز کی طرف سے اہم مدد فراہم کی گئی۔

Indian Citizen Convicted for Fake VAWA Petition; USCIS Aided FBI Probe into Immigration Fraud Scheme