پاکستانی امریکن کمیونٹی رہنما اجمل چوہدری کے بیٹے فرحان اجمل کار حادثے میں شدید زخمی

پاکستانی امریکن کمیونٹی رہنما اجمل چوہدری کے بیٹے فرحان اجمل کار حادثے میں شدید زخمی
فرحان اجمل چوہدری اوشن پارک وے ، بروکلین میں سڑک عبور کرتے ہوئے کار حادثے کا شکار ہوئے ، ڈرائیور جائے وقوعہ سے فرار ، حادثہ ویڈیو پر ریکارڈ ہو گیا

نیویارک ( محسن ظہیر سے ) پاکستانی امریکن کمیونٹی نیویارک کی معروف سماجی شخصیت اجمل چوہدری کے جواں سال صاحبزادے فرحان اجمل چوہدری سوموار، 23مارچ کو بروکلین ، نیویارک میں کار حادثے کا شکار ہو کر شدید زخمی ہو گئے جبکہ ڈرائیور جائے وقوعہ سے فرار ہو گیا جس کی پولیس کو تلاش ہے ۔
تفصیلات کے مطابق فرحان اجمل چوہدری جن کا فارمیسی کا بزنس ہے ، سوموار کی شام تقریباً سات بج کر بیس منٹ پر اپنے گھر سٹیٹن آئی لینڈ جاتے وقت ، اوشن پارک بروکلین پر واقع اپنے ایک کلائنٹ ( مریض ) کو گھر پر ادویات ڈیلیور کرنے کے لئے پیدل سٹرک عبور کررہے تھے ۔ فرحان چوہدری ، اوشن پارک وے کے درمیان کھڑے ہو کر پارک وے کو عبور کرنے کا انتظار کررہے تھے کہ اچانک ، نارتھ کی طرف جانے والی ایک تیز رفتار گاڑی نے انہیں ہٹ کیا ۔ بتایا گیا ہے کہ گاڑی کی ٹکر کی وجہ سے فرحان چوہدری تین سے چار فٹ اوپر اچھلے اور کم از کم دس فٹ سے زائد دور ی کے فاصلے پر جا کر گرے ۔

اس حادثے کی ایک ویڈیو کیمرے میںریکارڈنگ محفوظ ہو گئی جس میں فرحان اجمل کو گاڑی سے ٹکراتے ہوئے دیکھا جا سکتا ہے ۔
حادثے کی وجہ سے فرحان اجمل کو سر، کمر اور ٹانگ پر شدید چوٹیں آئیں اور وہ شدید زخمی ہو گئے ۔ حادثے کے فوری بعد مقامی راہ گیروں کی جانب سے پولیس اور ایمبولنس کو کال کی گئی ۔ ایمبولینس اور پولیس نے جائے وقوعہ پرپہنچنے کے بعد فرحان اجمل کو فوری طور پر ہسپتال منتقل کیا جہاں پر ان کو فوری طبی امداد فراہم کی گئی ۔
اجمل چوہدری نے اردو نیوز سے بات کرتے ہوئے کہا کہ اللہ تعالیٰ کی طرف سے بڑی آزمائش آئی ، اللہ تعالیٰ سے دعا گو ہیں کہ وہ بیٹے کو جلد از جلد صھت کاملہ و عاجلہ عطاءفرمائیں ۔ بتایا گیا ہے کہ گو کہ فرحان اجمل شدید زخمی ہیں ، تاہم اب ان کی حالت خطرے سے باہر ہے اور وہ ہوش میں ہیں اور فیملی سے بات بھی کررہے رہے ہیں ۔ یہ بھی بتایا گیا ہے کہ ان کی ایک یا ایک سے زائد سرجریز ہوں گی ۔
پاکستانی امریکن کمیونٹی اور اجمل چوہدری اور چوہدری فیملی کے عزیز و اقارب نے دعا کی ہے کہ اللہ تعالیٰ فرحان اجمل کو صحت کاملہ و عاجلہ اور عمر دراز عطاءفرمائیں ۔

Pakistani American Leader Ajmal Chaudhry’s Son Farhan Ajmal Injured in Brooklyn Hit-and-Run, Incident Caught on Video