ویسٹ ورجینیا میں بھارتی نژاد جوڑے کے امیگریشن جرائم کا اعتراف

راجیش این پٹیل،نے غیر قانونی امیگرنٹ کو جان بوجھ کر لے جانے کا اعتراف کیا، اہلیہ اونیبہن پاٹیل نے غیر قانونی افراد کو ملازمت دینے کا اعتراف کیا،یو ایس اٹارنی آفس

نیویارک ( اردو نیوز) یو ایس امیگریشن اینڈ امیگریشن سروسز نے ایک ایسی تحقیقات میں قیمتی معاونت فراہم کی جس کے نتیجے میں گرین بریئرکے ایک بھارتی نژاد جوڑے نے امیگریشن جرائم کا اعتراف کر لیا۔
یو ایس اٹارنی آفس کے مطابق، راجیش این پاٹیل (51 سالہ)، رہائشی رونسوورٹ، نے غیر قانونی تارک وطن کو جان بوجھ کر لے جانے کا اعتراف کیا، جبکہ ان کی اہلیہ اونیبہن پاٹیل (44 سالہ) نے غیر قانونی افراد کو ملازمت دینے کا اعتراف کیا۔عدالتی دستاویزات کے مطابق نومبر 2020 سے ستمبر 2024 تک آکاش پرکاش مکووانا (30 سالہ)، جو بھارت کا شہری ہے اور غیر قانونی طور پر رونسوورٹ میں مقیم تھا، پاٹیل جوڑے کے زیر ملکیت ایک کاروبار میں کام کرتا رہا۔ دونوں ملزمان نے تسلیم کیا کہ انہوں نے مکووانا کو اس علم کے باوجود ملازمت پر رکھا کہ اس کا ویزا ختم ہو چکا تھا اور وہ امریکا میں غیر قانونی طور پر مقیم تھا۔
راجیش پاٹیل نے عدالت میں مزید اعتراف کیا کہ وہ مکووانا کو روزانہ کام پر لے جاتا اور واپس لاتا تھا کیونکہ مکووانا کے پاس گاڑی نہیں تھی۔ پاٹیل نے نہ صرف تنخواہ سے ٹیکس کی کٹوتی نہیں کی بلکہ مکووانا کا کرایہ اور اشیائے خورونوش کے اخراجات بھی برداشت کیے۔مکووانا نے پہلے ہی 14 مئی کو شناختی فراڈ کے جرم کا اعتراف کیا تھا۔ اس نے تسلیم کیا کہ اس نے ایک امریکی شہری سے جعلی شادی کے ذریعے گرین کارڈ حاصل کرنے کی سازش کی تھی۔ تاہم یہ منصوبہ ناکام رہا۔
راجیش پاٹیل نے بھی تسلیم کیا کہ وہ اس جعلی شادی کے منصوبے سے واقف تھا اور اس میں نقد ادائیگیوں کے ذریعے معاونت کی۔ اس مقدمے میں شریک ایک خاتون کالی این ہف (28 سالہ)، رہائشی فیئربری، الینوائے، نے مکووانا سے جعلی شادی کا اعتراف کیا اور اسے 12 جون کو پانچ سال کی فیڈرل پروبیشن کی سزا سنائی گئی۔
ہف کے سالے جوزف سانچیز (33 سالہ) نے بھی شادی کے منصوبے میں معاونت کا اعتراف کیا اور اسے 28 مئی کو پانچ سال کی پروبیشن کی سزا دی گئی۔راجیش پاٹیل کو 9 جنوری 2026 کو سزا سنائی جائے گی، جس میں پانچ سال قید، تین سال نگرانی، اور 2 لاکھ 50 ہزار ڈالر تک جرمانہ ہو سکتا ہے۔جبکہ اونیبہن پٹیل کو 5 جنوری 2026 کو سزا سنائی جائے گی، جس میں چھ ماہ قید، ایک سال نگرانی، اور 3 ہزار ڈالر جرمانہ شامل ہو سکتا ہے۔قائم مقام امریکی اٹارنی لیزا جی جانسٹن نے اس کیس کا اعلان کرتے ہوئے ہوم لینڈ سیکیورٹی انویسٹی گیشنز اور یو ایس امیگریشن اینڈ امیگریشن سروسز کی تفتیشی کاوشوں کو سراہا۔

West Virginia Couple Plead Guilty to Immigration Crimes