نیویارک: پاکستانی امریکن سماجی شخصیات عمران اگرہ اور سید انور شاہ واسطی فلسطین و اسرائیل کے دورے پر روانہ

پاکستانی امریکن کمیونٹی نیویارک کی معروف سماجی شخصیات عمران اگرہ اور سید انور شاہ واسطی فلسطین اور اسرائیل کے اہم مطالعاتی و مشاہداتی دورے پر روانہ ہو گئے ہیں۔ یہ دورہ اسرائیلی وزارتِ خارجہ کی دعوت پر کیا جا رہا ہے، جس کے دوران وفد یروشلم، غزہ کی سرحدی پٹی، مغربی کنارے (ویسٹ بینک)، تل ابیب سمیت دیگر مقامات کا دورہ کرے گا۔

عمران اگرہ نے روانگی سے قبل بتایا کہ اس دورے کا بنیادی مقصد مختلف کمیونٹیز کے لوگوں سے براہِ راست ملاقات، ان کے خیالات سننا اور زمینی حقائق کو قریب سے سمجھنا ہے تاکہ واپسی پر پیش کی جانے والی آراء مفروضوں کے بجائے حقیقی مشاہدات اور مکالمے پر مبنی ہوں۔ دورے کے دوران وہ اسرائیلی حکام کے علاوہ یہودی، مسلم اور مسیحی مذہبی رہنماؤں، سول سوسائٹی کے نمائندوں اور حکومتی اہلکاروں سے بھی ملاقاتیں کریں گے۔

انہوں نے کہا کہ دورے کے بعد وہ نیویارک میں ایک خصوصی عشائیے کا اہتمام کریں گے، جس میں یہودی، مسلم اور مسیحی کمیونٹیز کے نمائندوں کو مدعو کیا جائے گا۔ اس نشست میں وہ اپنے پہلے مقدس سرزمین (ہولی لینڈ) کے دورے کے تجربات اور مشاہدات شیئر کریں گے، سوالات کے جواب دیں گے اور نفرت، تشدد اور یہود دشمنی کے خاتمے کے ساتھ ساتھ باہمی ہم آہنگی اور بقائے باہمی کے فروغ پر عملی تجاویز پر گفتگو کی جائے گی۔ عشائیے کی تاریخ اور مقام کا اعلان واپسی کے بعد کیا جائے گا۔

عمران اگرہ اور سید انور شاہ واسطی نے کمیونٹی اراکین سے اپیل کی ہے کہ اگر کسی کے پاس تعمیری رہنمائی، اہم روابط یا ایسے نقطۂ نظر ہوں جو امن، عدم تشدد، عدم نفرت اور بین المذاہب ہم آہنگی کے فروغ کے لیے معاون ثابت ہو سکتے ہوں تو وہ ضرور شیئر کریں۔ ان کا کہنا ہے کہ ایسے تمام خیالات اور آوازیں جو امن اور بقائے باہمی کے لیے سنجیدہ ہوں، اس دورے کے مقاصد کے عین مطابق ہیں۔

Imran Agha and Syed Anwar Shah Wasti Depart for Israel–Palestine Peace & Dialogue Visit