نیویارک: سب وے مسافر پر وحشیانہ حملہ، بروکلین کے شخص کو 10 سال قید کی سزا
اے ٹرین میں مسافر کے سر اور چہرے پر 30 سے زائد مرتبہ پاؤں مارے، واقعے کی سی سی ٹی وی فوٹیج سے ملزم کی شناخت ہوئی
نیویارک: سب وے مسافر پر وحشیانہ حملہ، بروکلین کے شخص کو 10 سال قید کی سزا
اے ٹرین میں مسافر کے سر اور چہرے پر 30 سے زائد مرتبہ پاؤں مارے، واقعے کی سی سی ٹی وی فوٹیج سے ملزم کی شناخت ہوئی
نیویارک (اردو نیوز) بروکلین کے ڈسٹرکٹ اٹارنی ایرک گونزالیز نے اعلان کیا ہے کہ سب وے میں ایک مسافر پر حملہ کرنے اور اسے شدید زخمی کرنے کے جرم میں 37 سالہ جیسن رئیس کو 10 سال قید کی سزا سنا دی گئی ہے۔ ملزم نے گزشتہ ماہ اقدامِ قتل کے جرم کا اعتراف کیا تھا۔
استغاثہ کے مطابق یہ واقعہ 20 اکتوبر 2024 کو صبح تقریباً 4 بج کر 35 منٹ پر پیش آیا، جب ملزم اور متاثرہ شخص نیویارک کی جنوب کی جانب جانے والی اے ٹرین میں سوار تھے۔ ٹرین بروکلین کے علاقے لافائیٹ ایونیو سے کوئنز کے علاقے فار راک اوے کی طرف جا رہی تھی۔
عدالتی شواہد کے مطابق ملزم نے مبینہ طور پر دیکھا کہ متاثرہ شخص نے ایک خاتون مسافر کی طرف فرنچ فرائز پھینکے۔ اس پر ملزم نے متاثرہ شخص سے سامنا کیا اور معافی مانگنے کا مطالبہ کیا۔ اس کے بعد اس نے مسافر کے سر پر متعدد مکے مارے، جس سے وہ زمین پر گر گیا۔
استغاثہ کے مطابق متاثرہ شخص کے زمین پر گرنے کے بعد ملزم نے اس کے جسم پر لاتیں ماریں اور اپنے دائیں پاو¿ں سے اس کے سر اور چہرے پر کئی منٹ تک 30 سے زائد مرتبہ وار کیے۔ متاثرہ شخص کے دوست نے اسے روکنے کی کوشش کرتے ہوئے کہا کہ وہ اسے جان سے مار دے گا اور پولیس کو بلانا ضروری ہے۔ اس پر ملزم نے مبینہ طور پر دوست کو بھی دھمکی دی اور اس کے چہرے پر مکا مارا۔
استغاثہ کے مطابق ملزم نے حملے کے دوران اپنے موبائل فون سے ویڈیو بھی بنائی۔ اس نے متاثرہ شخص کی جیبوں کی تلاشی لے کر 60 ڈالر نقد اور ایک موبائل فون نکال لیا، جسے بعد میں متاثرہ شخص کے چہرے کی طرف پھینکا۔ اس کے بعد ملزم ٹرین سے اتر کر پٹکن ایونیو پر واقع اپنی رہائش گاہ کی طرف پیدل چلا گیا۔
حملے کے بعد متعدد مسافروں نے 911 پر کال کی۔ زخمی شخص کو بروکڈیل اسپتال منتقل کیا گیا، جہاں طبی معائنے میں اس کی آنکھ کے گرد ہڈی اور ناک ٹوٹنے، دماغی چوٹ، دماغ میں خون بہنے اور پیشانی و ہونٹ پر زخموں کی تشخیص ہوئی۔ اسے چہرے پر سوجن اور نیل بھی آئے اور وہ چار روز تک اسپتال میں زیر علاج رہا۔
حکام کے مطابق پولیس نے حملے کی نگرانی کی ویڈیو اور دیگر سی سی ٹی وی تصاویر کی مدد سے ملزم کی شناخت کی۔ فوٹیج میں ملزم کو ٹرین سے اترنے اور اپنی رہائش گاہ کی طرف جاتے ہوئے دیکھا گیا، جس کے بعد
اسے گرفتار کیا گیا۔37 سالہ جیسن رئیس کا تعلق بروکلین کے علاقے ایسٹ نیویارک سے ہے۔ اس نے 28 ستمبر 2026 کو سیکنڈ ڈگری اقدامِ قتل کے جرم کا اعتراف کیا تھا۔ بروکلین سپریم کورٹ کے جج میتھیو بلم نے اسے 10 سال قید اور رہائی کے بعد پانچ سال نگرانی میں گزارنے کی سزا سنائی۔
بروکلین ڈسٹرکٹ اٹارنی ایرک گونزالیز نے کہا کہ یہ بے مقصد تشدد کا ایک سنگین واقعہ تھا، جس میں سب وے کے ایک مسافر کو شدید زخمی کیا گیا۔ ان کے مطابق سزا کا مقصد ملزم کو اس کے جرم کا جواب دہ ٹھہرانا اور نیویارک کے پبلک ٹرانزٹ نظام کو محفوظ بنانے کے عزم کا اعادہ کرنا ہے۔مقدمے کی پیروی اسسٹنٹ ڈسٹرکٹ اٹارنی الیکسس لائٹنر نے کی، جبکہ نگرانی اسسٹنٹ ڈسٹرکٹ اٹارنی آندریا اورلینڈو نے کی۔
