نیویارک، 23 مارچ 2026: پاکستان نے گزشتہ آٹھ دہائیوں کے دوران بظاہر ناقابلِ عبور چیلنجز پر قابو پا کر زندگی کے مختلف شعبوں میں نمایاں پیش رفت کی ہے۔ پاکستان کا سفر استقامت اور امید کی روشن مثال ہے، اور ملک نے خطے اور اس سے باہر امن، استحکام اور مشترکہ خوشحالی کے فروغ میں ایک ذمہ دار کردار ادا کیا ہے۔
یہ بات اقوامِ متحدہ میں پاکستان کے مستقل مندوب، سفیر عاصم افتخار احمد نے آج پرچم کشائی کی تقریب سے خطاب کرتے ہوئے کہی۔
اقوامِ متحدہ میں پاکستان کے مستقل مشن نے نیویارک میں پاکستان کے قونصلیٹ جنرل کے اشتراک سے یومِ پاکستان کی مناسبت سے ایک سادہ مگر پُروقار تقریب کا اہتمام کیا۔اس سے قبل، سفیر عاصم افتخار احمد نے قومی ترانے کی دھن پر قومی پرچم لہرایا۔
اپنے خطاب میں سفیر نے پاکستان کے سفر کو تین مختلف مراحل میں بیان کیا۔پہلے مرحلے میں انہوں نے قیامِ پاکستان کی تاریخی جدوجہد کا جائزہ لیا اور برصغیر کے مسلمانوں کی بے مثال تحریکِ آزادی سے رہنمائی حاصل کرنے پر زور دیا۔ انہوں نے کہا کہ پاکستان کا قیام ایک معجزہ تھا، جو برطانوی سامراج اور جڑیں پکڑے ہوئے ہندو اکثریتی رجحانات کی مشترکہ مخالفت کے باوجود ممکن ہوا۔
مستقل مندوب نے تحریکِ آزادی کی منفرد خصوصیات کو اجاگر کرتے ہوئے کہا کہ یہ ایک جمہوری، قانونی، پُرامن اور آئینی جدوجہد تھی، جس کی قیادت قائداعظم محمد علی جناح کی بصیرت افروز رہنمائی میں ہوئی۔ انہوں نے ان لاکھوں افراد کو خراجِ عقیدت پیش کیا جنہوں نے قائداعظم کے گرد متحد ہو کر ایک آزاد وطن کے حصول کے لیے عظیم قربانیاں دیں۔
دوسرے مرحلے میں، جو قیامِ پاکستان سے لے کر آج تک کے عرصے پر محیط ہے، سفیر عاصم افتخار احمد نے مختلف شعبوں جیسے ادب، فنون، موسیقی، کھیل اور خواتین کو بااختیار بنانے میں پاکستان کی نمایاں کامیابیوں کا ذکر کیا۔
گزشتہ آٹھ دہائیوں کے دوران درپیش چیلنجز اور نشیب و فراز کا اعتراف کرتے ہوئے انہوں نے کہا کہ پاکستان نے ہمیشہ اپنے بنیادی نظریات پر قائم رہنے کی کوشش کی ہے۔ انہوں نے پاکستان کے مضبوط اور ناقابلِ تسخیر دفاع کا ذکر کرتے ہوئے کہا کہ پاکستان اسلامی دنیا کی واحد ایٹمی طاقت ہے۔
اس موقع پر انہوں نے ملک کے دفاع میں مسلح افواج کے کردار کو سراہا۔ انہوں نے گزشتہ سال مئی میں بھارتی جارحیت کا حوالہ دیتے ہوئے کہا کہ جس طرح ہمارے بہادر سپاہیوں نے دشمن کو عبرتناک شکست دی، وہ طویل عرصے تک یاد رکھی جائے گی۔
انہوں نے کہا کہ پاکستانی قوم اپنی مسلح افواج پر فخر کرتی ہے جنہوں نے دہشت گردی کے خلاف جنگ میں مثالی قربانیاں دی ہیں۔ انہوں نے کہا کہ پاکستان نے اپنی خودمختاری کا تحفظ کیا ہے اور اندرونی و بیرونی خطرات کا مؤثر انداز میں مقابلہ کیا ہے۔ انہوں نے دہشت گردی کے چیلنج سے نمٹنے اور قومی اتحاد کے ذریعے دشمن کی سازشوں کو ناکام بنانے میں کامیابیوں کو اجاگر کیا۔
انہوں نے واضح کیا کہ کالعدم تنظیموں جیسے ٹی ٹی پی، فتنہ الخوارج اور فتنہ الہندوستان یا کسی بھی گروہ کے لیے پاکستان کا پیغام دو ٹوک ہے کہ اگر وہ ملک کے امن و سلامتی کو نقصان پہنچانے کی کوشش جاری رکھیں گے تو ان کے خلاف بھرپور کارروائی کی جائے گی، چاہے وہ کہیں بھی موجود ہوں۔
جموں و کشمیر کے حوالے سے پاکستان کے اصولی مؤقف کا اعادہ کرتے ہوئے انہوں نے کہا کہ پاکستان، جو حقِ خودارادیت کے اصول کے تحت وجود میں آیا، کشمیری عوام کی جائز اور قانونی جدوجہدِ آزادی کی اخلاقی، سیاسی اور سفارتی حمایت جاری رکھے گا۔ انہوں نے کہا کہ مسئلۂ جموں و کشمیر پاکستان کی خارجہ پالیسی کا ایک مرکزی ستون ہے۔
پاکستان کے بڑھتے ہوئے سفارتی کردار کا ذکر کرتے ہوئے انہوں نے کہا کہ پاکستان ایک ذمہ دار اور امن پسند ریاست کے طور پر ابھرا ہے جو متوازن اور دور اندیش خارجہ پالیسی کے ذریعے باہمی فائدے پر مبنی شراکت داریوں کو فروغ دے رہا ہے۔
تیسرے مرحلے میں، سفیر نے اس امر کا اعتراف کیا کہ اب بھی کئی چیلنجز درپیش ہیں، جن میں غیر مستحکم علاقائی صورتحال اور دہشت گردی کا خطرہ شامل ہیں۔ انہوں نے کہا کہ ماضی کی کامیابیوں کو مستحکم کرنے اور مزید آگے بڑھنے کی ضرورت ہے۔
اجتماعی ذمہ داری پر زور دیتے ہوئے انہوں نے کہا کہ پاکستان کی حقیقی صلاحیتوں کو بروئے کار لانے کے لیے قومی سطح پر مشترکہ کوششوں کی ضرورت ہے، جس میں معاشرے کے تمام طبقات اپنا کردار ادا کریں۔
سفیر نے مشن کے افسران اور عملے کی پیشہ ورانہ صلاحیتوں اور لگن کو سراہتے ہوئے کہا کہ وہ اقوامِ متحدہ میں پاکستان کے مؤقف کو مؤثر انداز میں اجاگر کر رہے ہیں۔
انہوں نے کہا کہ کثیرالجہتی فورم پر ملک کی خدمت کرنا ایک اعزاز اور ایک بڑی ذمہ داری ہے۔تقریب کا اختتام ایک مضبوط، خوشحال اور ترقی یافتہ پاکستان کے لیے نئے عزم کے ساتھ ہوا۔
Pakistan Day Commemorated at the Pakistan Mission to the UN
