بجلی اور گیس کے مہنگے بل، نیویارک سٹیٹ شہریوں کو 100سے200ڈالرز ری بیٹ چیک دیگی
نیویارک اسٹیٹ ڈیپارٹمنٹ آف ٹیکسیشن اینڈ فنانس کے ذریعے تقریباً 82 لاکھ گھرانوں کو یکمشت امدادی چیک فراہم کیے جائیں گے
بجلی اور گیس کے مہنگے بل، نیویارک سٹیٹ شہریوں کو 100سے200ڈالرز ری بیٹ چیک دیگی
”پاور“ ری بیٹ اسکیم کے تحت نیویارک اسٹیٹ ڈیپارٹمنٹ آف ٹیکسیشن اینڈ فنانس کے ذریعے تقریباً 82 لاکھ گھرانوں کو یکمشت امدادی چیک فراہم کیے جائیں گے
نیویارک ( اردونیوز) نیویارک اسٹیٹ کی جانب سے شہریوں کو بجلی اور گیس کے مہنگے بلوں سے ریلیف دینے کے لیے ”پاور“ (POWER) ریبیٹ چیکس بھیجنے کا شیڈول جاری کر دیا گیا ہے۔ اس اسکیم کے تحت نیویارک اسٹیٹ ڈیپارٹمنٹ آف ٹیکسیشن اینڈ فنانس کے ذریعے تقریباً 82 لاکھ گھرانوں کو یکمشت امدادی چیک فراہم کیے جائیں گے۔ یہ پیپر چیک 21 ستمبر 2026 سے خودکار طریقے سے ڈاک کے ذریعے بھیجے جائیں گے، اور یہ سلسلہ دسمبر 2026 تک جاری رہے گا۔ اس ریلیف رقم کو حاصل کرنے کے لیے شہریوں کو کسی بھی قسم کی درخواست یا فارم جمع کرانے کی ضرورت نہیں ہے، بلکہ یہ ٹیکس ڈپارٹمنٹ کے ریکارڈ کے مطابق خود بخود اہل افراد کو بھیج دیے جائیں گے۔
اس امدادی رقم کی اہلیت کا معیار شہریوں کے بجلی کے بلوں کے بجائے ان کی سال 2024 کی انکم ٹیکس ریٹرن پر رکھا گیا ہے۔ اس اسکیم سے فائدہ اٹھانے کے لیے لازمی ہے کہ آپ نے سال 2024 کا نیویارک اسٹیٹ انکم ٹیکس ریٹرن فائل کیا ہو، آپ اس پورے سال کے دوران نیویارک کے مستقل رہائشی رہے ہوں، اور آپ کو کسی دوسرے شخص کے ٹیکس ریٹرن پر ڈیپینڈنٹ کے طور پر ظاہر نہ کیا گیا ہو۔ وہ سنگل افراد جن کی سالانہ آمدنی 150,000 ڈالر سے زیادہ ہے، اور وہ شادی شدہ جوڑے جن کی مجموعی آمدنی 300,000 ڈالر سے زائد ہے، اس ریبیٹ کے اہل نہیں ہوں گے۔
چیک کی رقم مختلف انکم بریکٹس اور ٹیکس فائلنگ اسٹیٹس کے حساب سے 100 سے 200 ڈالر کے درمیان ہوگی۔ ایسے شادی شدہ جوڑے جو مشترکہ ٹیکس فائل کرتے ہیں اور ان کی سالانہ آمدنی 150,000 ڈالر سے کم ہے، انہیں 200 ڈالر کا چیک ملے گا، جبکہ 150,000 سے 300,000 ڈالر کے درمیان کمانے والے جوڑوں کو 150 ڈالر دیے جائیں گے۔ دوسری طرف، 150,000 ڈالر سے کم آمدنی والے انفرادی یا سنگل ٹیکس گزاروں کو 100 ڈالر کا ریبیٹ چیک موصول ہوگا۔ انتظامیہ نے شہریوں کو خبردار کیا ہے کہ وہ اس حوالے سے کسی بھی قسم کے آن لائن اسکام یا جعلی لنکس سے ہوشیار رہیں کیونکہ یہ رقم صرف آفیشل پیپر چیک کی صورت میں ہی ڈاک کے ذریعے بھیجی جا رہی ہے۔
