وفاقی جج کا وائس آف امریکہ کے 500ملازمین بحال کرنے کا حکم
Judge order to reinstate Voice of America 500 employees
نیویارک (اردو نیوز) نیویارک ٹائمز کے مطابق ایک وفاقی جج نے پیر کے روز ٹرمپ انتظامیہ کو حکم دیا ہے کہ وہ وائس آف امریکہ کے تقریباً تمام باقی رہ جانے والے ملازمین کو بھیجے گئے برطرفی کے نوٹس واپس لے۔ وائس آف امریکہ ایک وفاقی نیوز ادارہ ہے جو ان ممالک میں آزاد اور غیرجانبدارانہ رپورٹنگ فراہم کرتا ہے جہاں صحافت پر سخت پابندیاں عائد ہیں، جیسے چین، روس اور ایران۔
امریکی ڈسٹرکٹ کورٹ، واشنگٹن ڈی سی کے جج روائس سی لیمبرتھ نے اپنے فیصلے میں کہا کہ ٹرمپ انتظامیہ نے عدالت کے اپریل میں دیے گئے حکم کی خلاف ورزی کی ہے، جس میں وائس آف امریکہ کی نشریات بحال رکھنے اور ادارے کو ایک مستند اور قابلِ اعتماد ذریعہ خبر کے طور پر چلانے کا حکم دیا گیا تھا۔
رپورٹ کے مطابق، ٹرمپ کی قریبی اتحادی اور ایریزونا کی سابق اینکر کیری لیک، جو وائس آف امریکہ کے ڈھانچے کو کمزور کرنے کی کوششوں کی قیادت کر رہی تھیں، نے عدالت کے احکامات کے باوجود ادارے کے عملے اور نشریاتی سرگرمیوں کو محدود رکھا۔ اگست میں، جج لیمبرتھ کی جانب سے ممکنہ خلاف ورزی پر تنقید کے چند دن بعد ہی، لیک نے ادارے کے 532 فل ٹائم صحافیوں اور معاون عملے کو فارغ کرنے کا فیصلہ کیا۔ صرف تین ریڈیو ٹیکنیشنز کو برقرار رکھا گیا، حالانکہ کانگریس کی ہدایت کے مطابق ریڈیو نشریات کے لیے ان ملازمین کی موجودگی لازمی تھی۔
