خیبر پختونخوا میں گورنر راج کا نفاذ جمہوری مینڈیٹ پر سنگین حملہ ہے، نوید وڑائچ

خیبر پختونخوا میں گورنر راج کا نفاذ جمہوری مینڈیٹ پر سنگین حملہ ہے، نوید وڑائچ
خیبر پختونخوا میں تحریک انصاف کے زیرِ حراست سیاسی رہنماؤں اور کارکنوں کے قانونی حقوق کا مکمل احترام کیا جائے، کسی بھی غیر قانونی حراست کی صورت میں فوری قانونی کارروائی اور منصفانہ سماعت یقینی بنائی جائے، نوید وڑائچ

نیو جرسی( پ ر ) پاکستان تحریک انصاف نیو جرسی کے چیف کوآرڈینیٹر نوید وڑائچ نے خیبر پختونخوا میں گورنر راج کے نفاذ، منتخب صوبائی حکومت کو معطل کرنے اور وزیراعلیٰ سہیل آفریدی سمیت صوبائی قیادت کے ارکان کو حراست میں لیے جانے پر شدید تشویش اور سخت الفاظ میں مذمت کا اظہار کیا ہے۔ اپنے بیان میں مزید کہا کہ خیبر پختونخوا میں منتخب حکومت کو اس انداز میں معطل کرنا عوام کے جمہوری مینڈیٹ، صوبائی خودمختاری اور جمہوری روایات کے حوالے سے نہایت سنگین معاملہ ہے۔ قومی سلامتی اور امن و امان کے مسائل کا حل سیاسی تصادم، عوامی نمائندوں کی گرفتاریوں اور جمہوری عمل کو محدود کرنے میں نہیں، بلکہ قانون کی حکمرانی، شفاف احتساب، سیاسی مکالمے اور عوام کے اعتماد کی بحالی میں ہے۔انہوں نے کہا کہ آئین کسی ایک جماعت، حکومت یا ادارے کی ملکیت نہیں، بلکہ پاکستان کے تمام شہریوں کے حقوق کا ضامن ہے۔ اگر کسی حکومتی اقدام کی آئینی حیثیت پر سوال اٹھتے ہیں تو ان کا فیصلہ آزاد عدلیہ اور آئینی اداروں کے ذریعے ہونا چاہیے۔ کسی بھی غیر معمولی اقدام کو آئینی جواز، قانونی تقاضوں اور بنیادی انسانی حقوق کی کسوٹی پر پرکھنا ضروری ہے۔

نوید وڑائچ نے مزید کہا کہ پشاور اور خیبر پختونخوا محض پاکستان کا ایک صوبہ نہیں، بلکہ ملک کی تاریخ، ثقافت، جغرافیائی سلامتی اور قومی یکجہتی کا ایک اہم ستون ہیں۔ افغانستان کے ساتھ طویل سرحد، مسلسل سکیورٹی چیلنجز اور دہشت گردی کے خلاف طویل جدوجہد نے اس خطے کے عوام کی زندگیوں پر گہرے اثرات مرتب کیے ہیں۔ یہاں کے بہادر عوام نے امن، استحکام اور پاکستان کی سلامتی کے لیے بے شمار قربانیاں دی ہیں۔ ان کی قربانیوں کا تقاضا ہے کہ انہیں مزید سیاسی بے یقینی، معاشی مشکلات اور خوف و ہراس سے دوچار کرنے کے بجائے امن، انصاف، ترقی اور باعزت زندگی کے مواقع فراہم کیے جائیں۔
انہوں نے کہا کہ پختون عوام کی حب الوطنی، جرات اور قربانیوں کو سیاسی اختلافات کی بنیاد پر نظرانداز نہیں کیا جا سکتا۔ دہشت گردی کے خلاف جنگ میں کامیابی کے لیے عوام کا اعتماد، مقامی آبادی کے حقوق کا تحفظ اور تمام جمہوری قوتوں کا تعاون ناگزیر ہے۔ عوامی نمائندوں اور سیاسی کارکنوں کے خلاف کارروائیوں سے اگر سیاسی بے چینی میں اضافہ ہوتا ہے تو اس کا نقصان پورے ملک کو اٹھانا پڑ سکتا ہے۔
نوید وڑائچ نے مطالبہ کیا کہ زیرِ حراست سیاسی رہنماؤں اور کارکنوں کے قانونی حقوق کا مکمل احترام کیا جائے، کسی بھی غیر قانونی حراست کی صورت میں فوری قانونی کارروائی اور منصفانہ سماعت یقینی بنائی جائے، شہریوں کی روزمرہ زندگی، نقل و حرکت اور بنیادی آزادیوں کا تحفظ کیا جائے، اور تمام سیاسی تنازعات کو طاقت کے بجائے آئین، قانون اور مذاکرات کے ذریعے حل کیا جائے۔
انہوں نے واضح کیا کہ پاکستان کی مضبوطی کا راستہ جمہوریت، پارلیمان کی بالادستی، آئین کی پاسداری اور عوام کے فیصلے کے احترام سے ہو کر گزرتا ہے۔ کسی بھی صوبے کے عوام کو یہ احساس نہیں ہونا چاہیے کہ ان کی منتخب قیادت اور ان کے ووٹ کی کوئی اہمیت نہیں۔ پاکستان کی سلامتی اور یکجہتی اسی وقت مضبوط ہو سکتی ہے جب ہر صوبے کے شہریوں کو برابر کے حقوق، انصاف اور جمہوری نمائندگی حاصل ہو۔
نوید وڑائچ نے خیبر پختونخوا کے عوام کے ساتھ مکمل یکجہتی کا اظہار کرتے ہوئے مطالبہ کیا کہ آئینی حقوق کا تحفظ کیا جائے، سیاسی کشیدگی کم کی جائے اور جمہوری عمل کو بحال کرنے کے لیے فوری اور سنجیدہ اقدامات کیے جائیں۔

Naveed Waraich Calls KP Governor’s Rule an Attack on Democratic Mandate
Urges Protection of Legal Rights of Detained PTI Leaders and Workers, Calls for Immediate Legal Action Against Unlawful Detentions and Fair Hearings